En Galinus, Taller de Novos Medios, seguimos de mudanza: xa temos nova sede, novos mobles, e neste ano, tamén novos e ilusionantes proxectos.

Case sen darnos conta chegamos á segunda etapa na traxectoria desta mudanza da nosa páxina web. E cal é o obxecto desta segunda etapa? Pois, como en calquera dos proxectos que afrontamos, para poder dar unha boa solución, debemos coñecer ben ao cliente.

Neste caso, como o cliente somos nós mesmos, tivemos que discorrer cal era o mellor xeito de definirnos, de investigar quen somos, de tentar chegar á raíz deste proxecto que é Galinus.

Se algo temos claro, é que somos o que somos (e facemos o que facemos) polo contorno no que nos atopamos. Nos 7 anos que levamos na Costa da Morte conseguimos sentirnos parte desta parte do mundo, dun xeito moito máis profundo que en calquera das nosas vivencias anteriores.

Por todo iso contamos coa colaboración dos nosos conveciños de Corcubión e con eles creamos un novo vídeo da factoría Galinus TV. Falamos con eles sobre o que opinaban da nosa chegada, o que pensan sobre o noso traballo, e o que esperan que cheguemos a ser; e con iso construímos un pequeno discurso, non desprovisto de humor, acerca da nosa identidade como empresa.

O feito de que as persoas sexan o elemento máis importante neste proxecto fixo que, en agradecemento aos protagonistas, realizáramos unha estrea na vila (no Pazo, un dos bares senlleiros de Corcubión), con photocall, alfombra vermella, carteis promocionais, entrega de premios, pinchos e este microsite para contalo e compartilo con todos vós.

Esperamos que o resultado vos guste tanto como nós disfrutamos facéndoo, e que vos axude a coñecernos a través da xente coa que convivimos diariamente.