Padrons de desenho de interacçom

Introduçom

Cada vez que se começa um novo sítio web sempre que desenhar elementos já presentes noutras webs (a navegaçom do sítio, registo de usuários, organizaçom por categorias do conteúdo, carrinhos da compra, etc).

Em vez de desenhar nós mesmos cada soluçom, podemos recorrer aos padrons.

Que som os padrons

Os padrons de desenho e interacçom som soluçons já provadas que ajudam a criar sítios web sem ter de pensar cada soluçom desde o zero.

Utilizando padrons aforraremos tempo e poderemos dedicar as nossas energias a outros aspectos da web. Ademais, teremos a segurança de que a eficácia das soluçons está comprovada.

É provável que já os estejas a utilizar. O simples facto de navegarmos pola web fai com que vaiamos absorvendo as soluçons mais comuns. Quando desenhamos um sítio web utilizaremos todo esse conhecimento adquirido. No entanto, todo este conhecimento estará desordenado e muitas vezes temos assimilada a soluçom de um modo superficial.

Precisamos de umha peneira ampla, de soluçons provadas e bem documentada para poder desenhar sedes web de qualidade.

Formato e aplicaçom

Os padrons utilizados de modo isolado som de pouca utilidade. Quando aplicamos um padrom a um problema concreto cumpre termos em linha de conta outros padrons que também entram em jogo.

Com um conjunto de padrons é possível comunicar e solucionar problemas com umha linguagem muito potente.

Cada padrom está descrito polo seu contexto de uso, soluçom prática e outras consideraçons a levar em linha de conta. Os padrons dam resposta às perguntas:

Quando é necessária umha soluçom já conhecida?
Por que é necessária?
Como se aplica?

Cada autor utiliza um esquema ligeiramente diferente para responder estas perguntas. Um exemplo é:

Nome do padrom.
Contexto: quando surge a necessidade de utilizar este padrom.
Problema: para que serve o padrom, a que necessidade dá soluçom. Soluçom: resposta concreta ao problema formulado.
Exemplo: caso real de uso.
Outros padrons relacionados: para completar a soluçom cumpre termos em linha de conta outros padrons.

Existem padrons mais abstractos (ex. Conhece a tua audiência) e outros que som soluçons mais concretas (ex. Botons). Quanto mais abstracto for o padrom, antes cumprirá utilizá-lo no desenvolvimento da web. Na medida em que avançamos utilizaremos padrons mais concretos.

Os padrons nom som fórmulas mágicas. Para escolher desenhar as soluçons adequadas com os padrons é preciso saber que esperam os usuários da nossa web.

Podemos utilizar os padrons para fazermos umha web desde o zero; mas também para solucionar problemas que se detectem numha web já existente.

Podes ver mais sobre o uso de padrons num exemplo prático.

Ligaçons

Padrons de desenho Em Grancomo podes encontrar muitas ligaçons de interesse para aprofundar no uso de padrons.

www.welie.com Padrons de interacçom para a Web, aplicaçons móveis e de escritório. Utiliza hipertexto para ligar padrons relacionados.

UI Patterns and Techniques

Implementing a Patterm Library im the Real World: A Yahoo! Case Study Caso prático de como criar umha linguagem comum para a comunicaçom entre membros da companhia.

Bibliografía